سواء كنت أول مرة تقوم بزيارة مدينة مرسي مطروح (مصر - تقع على البحر الأبيض المتوسط) او لم تقم بزيارة مدينة مرسى مطروح وتريد معرفة اهم المعالم السياحية في مدينة مرسي مطروح وأسماء الشواطئ ومواصفات كل شاطئ فيها فهذة المقالة لك
شواطئ قريبة من المدينة والعمار
1 💚 شاطئ الهنا "مبارك سابقا"
أقرب شاطئ لمنطقه شارع إسكندرية وزاهر جلال ومناسب جدا للأطفال لان الموج فيه هادي والمياه صافيه ونضيفه جدا و ده طبعا غير رملته الناعمة ويعتبر من أفضل الشواطئ بالنسبة لمصيفين كتير
2 💜 شاطئ العوام
الشاطئ الموجود أمام مسجد العوام على طول موجود في وسط البلد والمياه فيه جميله جدا ومناسب للأطفال وللكبار
3 💛 شاطئ الليدو & البوسيت
موجود في منطقه الليدو و البوسيت والشاطئ حلو جدا والمياه جميله ده غير اللسان الموجود بينهم وتقدروا تتمشوا على فالغروب بجد المنظر بيكون ممتع جدا
4 ❤ شاطئ روميل
البحر هادى جدا ولا يوجد أي موج خالص، يعنى لو معكم اطفال هتكونوا مطمئنين عليهم جدا، واوعوا تنسوا تزوروا المكان ده بليل هتلاقوا مكان خاص لركوب العجل و كافيهات وقاعدات بدويه تجنن بجد
5 💙 شاطئ الفيروز وباب البحر
يعتبروا قريبين جدا من منطقه روميل ونفس نظام المياه ويعتبروا بحيرة وأيضا المكان هناك أمن جدا على الاطفال ومن مميزات الشاطئ ده طبعا كافيتريا الكرم وميدان باب البحر والعجب واليأس بجي وطبعا والبرجولات بتاعته اللي فيها خصوصيه والقعده فيها مالهاش حل 👍👍👍
شواطئ بعيدة عن المدينة والعمار
ولو مش معاك عربيه تقدر تركب ليهم مواصلات من ميدان الجلاء قصاد المحكمة القديمة واسعارها مناسبه جدا
6 💛 شاطئ كليوباترا
و ده بينه وبين شارع إسكندرية حوالي 12 كيلو وفيه حمام كليوباترا الشهير
والشاطئ هناك مقسوم لجزئين
شاطئ عام 👈 وده المياه هادئة جدا وتقدر تنزل اولادك وانت مطمئن عليهم
شاطئ مفتوح 👈 و ده غير صالح ابدا للأطفال والنزول فيه بيكون صعبة جدا بس المناظر هناك حلوة اوى ده غير أنه مناسب للصيد
7 💚 شاطئ الغرام "شاطئ ليلى مراد"
من الشواطئ الحلوة اللي ناس كتير بتحبها جدا وهناك تلاقي صخره ليلى مراد لكن حاليا بقت ف وسط البحر بسبب عوامل الزحف، و الرملة بتاعته ناعمه جدا و ده بينه وبين شارع إسكندرية حوالي 15 كيلو تقريبا وده تاني شاطئ مفضل عندي بعد الأبيض 😍
8 💜 شواطئ الأُبَيِض
وهو عبارة عن حوالي 7 شواطئ ومنهم (الابيض العام، بلو بيتش، زمردة الابيض، عروس الابيض، المروة الجديد)
مستحيل تروح مطروح من غير ما تزورهم، هناك تلاقى أحلي وانقى مياه ممكن تشوفها ف حياتك والرملة كمان صافيه جدا وناعمه ده أجمل شاطئ ف مطروح ع الإطلاق هيفوتك نص عمرك لو مروحتهوش 😂
9 💙 شاطئ ام الرَخم
وأيضا المياه صافيه جدا وجميله وموقعه غرب مطروح وبينه وبين البلد حوالي 23 كيلو تقريبا
10 💜 شاطئ عجيبة
" اسم على مسمى فعلا "، بجد سبحان من أبدع وصور الجمال ده والصخور الرائعة المكان هناك حلو جدا ويستحق الزيارة، وبينه وبين وسط البلد حوالي 27 كيلو تقريبا
11 ❤ شاطئ مينا حشيش & الرمليه
ودول موقعهم بعد حوالي 10 كيلو تقريبا شرق مطروح
يتميز هزا الشاطئ بواجهة شرقية لا توثر فيها الرياح الشمالي والغربي ممتاز للسباحة وتوجد مناطق امنة للأطفال وايضا ممتاز للصيد
12 💜 شاطئ الجونة
وهو من انقى وأصفي شواطئ العالم رمال بيضا مياه صافية ونقية ليس لها مثيل يقع على طريق شاطئ عجيبة خلف فندق كارلوس بحوالي 100 متر
13 💚 شاطئ باجوش
ﻋﺒﺎﺭﺓ ﻋﻦ ﺧﻠﻴﺞ ﻭ ﻳﻌﺘﺒﺮ ﻣﻦ ﺃﺟﻤﻞ واروع ﺍﻟﺸﻮﺍﻃﺊ ﻭ ﻳﺒﻌﺪ ﻋﻦ ﻣﺪﻳﻨﺔ ﻣﻄﺮﻭﺡ
ﺍﻟﻌﺎﺻﻤﺔ ﺣﻮﺍﻟﻰ 48 ﻛﻢ ﺷﺮﻗﺎً
14 💛 شاطئ المروة الجديد
و ده من شواطئ الأبيض اللي اتكلمنا عليها وهو في طريق عجيبة قبل شاطئ الأبيض ليه دخله يمين مكتوب عليها شاطئ المروة الجديد
والموج فيه عالي بس منسوب المية منخفض يعني ممكن الاطفال يلعبوا في المية في بداية البحر بس تكون مخلي بالك اوى منهم
15 💖 شاطئ رأس الحكمة
يقع هذا الشاطئ شرقي مطروح العاصمة ب 70 كيلو متر تقريباً وهوه شاطئ عام وليس خاص. ولا توجد خدمات بهذا الشاطئ" ومن مميزات هذا الشاطئ أنه غير مزدحم ومناسب للخصوصية وللعائلات وأيضاً مناسب جداً للأطفال الصغار
أمكان الخروج والفسح (البرنامج والمزارات)
الخروج والفسح نهارًا
تجنبا للشمس وارتفاع درجة الحرارة أفضل خروجات تبقي البحر وأجمل حاجه ف مطروح شواطئها الكتير وان كل شاطئ غير الثاني خالص فتقدر كل يوم تغير شاطئ
فى اغلب الشواطئ العاب مائية بتتلعب فى البحر زى البانانا بوت وبيتراوح سعرها فى رينج 50 ج للفرد. والتيوبا او الكرسى ودا ب 80 ج للفرد والجيت سكى ودا الربع ساعة ب 200 ج لفرد او اتنين وعندك البراسيلينج للفرد حوالي 220 و الاتنين حوالي 350. والاسعار دى على فكرة ممكن تقل او تزيد لانها بتختلف اوقات من شاطئ لشاطئ
المواصلات للشاطئ
أولا: أنك تركب م الموقف اللي عند البنزينه قبل شارع اسكندريه و ده نقل عام ورخيص بس تسأل السواق اخر معاد هيرجع م الشاطئ فيه عشان مش هتعرف تتصرف م هناك خاالص لو مالحقتهوش
ثانيا: او تتفق مع عربيه تويوتا (حدود من 120 ل 180 ذهاب وعودة) أو سوزوكي (اقل م التويوتا) ع حسب عدادكم بقي وتحاسب وانت راجع 👌
الغرام: انسب شاطئ للأطفال ممكن تروح بعربية او بمركب من عند اخر الكورنيش كده نحية جيلاتي عزة و بيبقي أرخص م العربية وكمان ممتع جدا ❤
وممكن كمان تاجر يخت ب 400 جنيه... الشمسية هناك ب 120 جنية
الابيض العام: أجمل بحر ف مطروح حرفيا ❤❤
المالديف بجد المياه فيه نقيه جدا ونضيفه جدا بس ف موج حلو كده 😍 وكمان ف بانانا بوت ب 50 للفرد ...العربية م العوام ب 160 رايح جي والشمسية صف اول 120 و تاني 100
عجيبة: وهي عجيبة فعلا أجمل مكان تاخد فيه احلي صور ف الدنيا بس بحره عنيف شويه بعض الاحيان بس ممتع جدا جدا ❤👌
كليوبترا: بتروح تتصور صور جامده زحوليقه 😅 وترجع والعربية مش بمبلغ كبير
روميل: شاطئ روعه للأطفال وكمان الشمسية مش غالية والعربية بردوا مش بمبلغ كبير
الخروج والفسح ليلاً
المطاعم: مطعم واحد فول عنده كل الاكل الشعبي وانضف اكل فول وفلافل وكريب وبيتزا وفطائر حواوشي حلو وحادي فظييع وع بحر فالليدو بيتزاكينج ،برجركينج ،ماك ، جيلاتي عزه و مطاعم كتير بتبيع كل الاكل اللي بتحبه
السمك بقي بتروح تنقيه بايدك كده وتختار طريقة السوا وتتفق هتاخده امتي والاسعار حلوه جدا
سوق ليبيا وشارع اسكندرية: هتلاقي فيهم معارض كتير بيبيعوا كل حاجه و باسعار جميلة جدا و تقدر كملن تجيب هداية لكل حبيبك م هناك و ماتغرمش كتير بس شارع اسكندرية تمشيته حلوه جدا و اقرب ليك
السيرك: تزكرته رخيصه مش غاليه وفي عروض حلوه اوي ولادك هيتبسطوا جدا
الملاهي: هي صغيره بس فيها العااب كتيىر وممتعه جدا وتنفع للكبار والصغيرين و ماتتعداش 15جنيه. ألعب يلا 💃💃
العجل: تقدر بسهولة تأجر عجل و بيتش باجي وتركب طفطف وليله كبيره اوي سعادتك
وكمان عندك بقي ف كافيهات و بلاستيشن كتير واسعارهم كويسه جدا 👌
الكورنيش بقي وهواة الكورنيش والذرة السخنة والايس كريم 💨❤
برنامج لزيارة مطروح
أول يوم
طبعا انت بتوصل اول يوم وغالبا بتستلم الشقة او مكان سكنك نظيف والاغلبية بيكون السكن مش قبل الظهر مثلا .. فاول يوم دا انت بترتب حاجتك فى السكن وبتشترى طلباتك من السوق او الماركت وبتكون فاضى على اخر النهار فبتنزل على اقرب بلاج ليك فى السكن وبتقضى باقى اليوم .. وبالليل بتخرج تتمشى شوية على الكورنيش وترجع تنام .
ثاني يوم
لو مش معاك عربية بتكون نزلت وبتحاول تتعرف على سواق تاكسى محترم او سواق عربية كبيرة على حسبب عدد الناس ال معاك وبتظبط معاه وبتخد رقمه عشان هناك تتحرك بنظام ومن غير ما تبهدل الناس معاك ولان هناك المواصلات العامة للشواطئ والمزارات تكاد تكون معدومة فاى مواصلة هناك خارج البلد هتكون مواصلة خاصة ( فى مينى باص حكومى لونه احمر بيطلع من وسط البلد كل ساعة تقريبا ودا بيطلع للمزارات ال خارج البلد زى الابيض والغرام وكليو باترا لحد عجيبة وبسعر رمزى بس بيطلع كل ساعة فقط تقريبا واوقات كتير بيكون مكتمل ) هتكون مظبط طريقة انتقالاتك ولو معاك عربية هترتاح جدا وهتروح طالع الصبح بدرى على شاطئ عجيبة ودا برا البلد بحوالى 25 كيلو وعشان كدا يفضل يكون معاك عربية خاصة بيك .. بتروح الشاطئ وخلى بالك انت بتنزل مسافى حوالى 10 دقائق عشان تنزل من فوق لحد البحر تحت لان بداية الزيارة من مكان مرتفع جدا عشان تشوف المنظر كله من فوق وخلى بالك عجيبة مجرد شاطئ للزيارة والتصوير بس يفضل متقعدش هناك كتير عشان تستفيد بيومك يعنى ساعة ونصف بالكتير وتبتدى تتحرك بالعربية على البلاج ال هتقضى فيه باقى يومك .. وانصحكم جدا بشواطئ منطقة الابيض وعندك هناك فى شاطئ عام دخوله ببلاش وبتاجر الشمسية والثلاث كراسى ب حوالى 75 ج الى ١٠٠ ج وممكن تزود اى كرسى تانى بعد كدا .. وممكن تنزل فى شاطئ القوات المسلحة فى الابيض برضو ودا تكت دخول المدنيين ب 25 ج للفرد وجوا بتدفع ٤٥ ج للشمسية و 3 كراسى وكلهم نفس الشاطئ سواء العام او القوات المسلحة بس خلى بالك ان الخدمات على الشاطئ قليلة والحمامات مش نضيفة للاسف . ويفضل تخد معاك مشروباتك والسناكس ليك وللاولاد طول اليوم لانكم هناك هتحتاجو جدا ولو فى كولمان معاك وترمس شاى يكون حلو جدا وهيفيدك . ومتاح تقعد فى البلاج براحتك طول اليوم.. بس خلى بالك ان الابيض اوقات بيكون الموج فيه عالى شوية بشكل عام لانه بحر مفتوح ولكنه ممتع جدا بخلاف شواطئ وسط البلد والكورنيش بتكون هادية شوية لانها على خليج مقفول . وبتخلص يومك وبترجع تسهر برا بالليل براحتك.
ثالث يوم
بتصحى بدري برضو وبتكون مظبط مع العربية وبتخد نفس طريق عجيبة وبتطلع على مكان اسمه حمام كليو باترا ودا حوالى 15 كيلو تقريبا من مطروح ودا برضو شاطئ للزيارة فقط وبتروح هناك بتلاقى صخرة مجوفة وسط البحر على الشاطئ حواليها مياه من كل اتجاه وبتمشى بحرص جدا ويفضل تكون لابس شوز خاص بالبحر لان الارض هناك صخرية جدا وبتزحلق اوى فلازم تكون حريص جدا ولو معاك اطفال او كبار سن بلاش تخليهم يغامرو ويدخلو جوا.. بتدخل تتفرج على اندفاع المياه جوا الصخرة وبتتصور وبعدها بتركب العربية وتبتدى تتحرك على بلاج اسمه شاطئ الغرام بتدخل جوا وهو ليه تكت ٥ ج للفرد بتتفرج على الصخرة ال غنت عندها ليلى مرار اغنيتها الشهيرة فى مطروح.. وهناك فى شاطئ جميل جدا بتاجر شمسية وكراسى وبتقضى يومك فيه . وبالليل بتخرج برضو وبتقضى سهرتك.
باقي الايام
يا بتروح شاطئ من الشواطئ ال رحتها قبل كدا وعجبتك يا اما لو معاك اطفال وعاوز تنزلهم في بحر هادى جدا زى حمام السباحة ممكن تطلع على شواطئ منطقة روميل ودي على اخر الكورنيش في مطروح تلاقيها شواطئ هادية جدا جدا ومناسبة للأطفال اوى ومافيش فيها موج جامد. وعندك كمان بطول الكورنيش شواطئ عامة اغلبها بتكت بسيط ماعدا شواطئ قليلة اوى ال بتكون بتكت دخول غالى ممكن تختار شط كويس زى شاطئ العوام مثلا وسط البلد وتنزل فيه وده قريب منك وممكن تتمشى له كمان.
المواصلات الي مطروح
مطروح محافظة على ساحل البحر المتوسط بعد الساحل الشمالى .. وعشان تروحها لو رايح بعربيتك بتخد طريق الاسكندرية الصحراوي ومنه بيطلع على طريق العلميين لحد ما توصل مارينا في الساحل الشمالي بعد كدا بتخد الطريق الساحلى لحد ما تلاقى نفسك فى مطروح والمسافة هتخد منك من 5 ل 6 ساعات حسب سرعتك وحسب هتقف كام رست فى الطريق .. وفى طريقك يفضل تقف وانت على طريق اسكندرية فى رست نضيف هناك زى الماستر مثلا وتقف رست تانى بعد ما تخلص طريق العلميين / النطرون (فى طريق جديد ال هو طريق الفوكا ودا طريق دايركت من القاهرة ولكن خلى بالك فى منحنيات كتيرة خطر ومش عليه شبكة ويفضل ال يمشى عليه يكون حافظ الطريق كويس وحافظ الملفات مع العلم انه تقريبا نفس المسافة ال هتخدها فى الطريقين واحد)
الأوتوبيس
القطار
عندك نوم وعندك قطار مميز عادى وعندك قطار مكيف ولازم حجز قبلها بأسبوع مثلا.. وسعر القطار النوم (لازم الحجز بالبطاقة) ٢١٠ ج للفرد فى الكابينة / المكيف درجة اولى 120 ج / درجة تانية 80 ج / المميز العادي ب 20 ج ودا سعر الفرد ذهاب فقط او عودة فقط.
السكن والإقامة
فى مطروح زى ما وضحت اسمها مصيف عائلي ودا هتلاقى اغلب الناس بتقبل على ايجار شقق سكنية مفروشة بالمدة اسبوع مثلا او باليوم وبيكون على حسب الاتفاق سواء بقي من خلال سمسار او حد معرفة وعموما اسعار الشقق هناك تختلف في السعر على حسب موقع الشقة ومستواها ومستوى الفرش وقربها او بعدها عن البحر.. ومتوسط الاسعار هناك فى مطروح من 400 ج ل 600 ج فى الليلة ودي الشقق ال مش على البحر وفى وسط البلد ومستواها معقول ونضيف انما على البحر ممكن من ١٠٠٠ ج لحد ٢٥٠٠ واكتر كمان وطبعا الهاى سيزون بتاع مطروح هما شهرى يوليو واغسطس والاعياد وبالتالي دي بتكون أغلي اسعار في الفترة دى .. والشقة بتكون غير شاملة طبعا الوجبات ولا المشروبات. وفى فنادق هناك وهما نوعين.. فنادق للإقامة فقط وبتكون على البحر او على شوارع رئيسية ودي بتكون شاملة وجبة فطار او وجبتين بالكتير خالص فطار وغدا ومافيش اكتر من كدا والفنادق دى ما بين نجمتين ل 4 نجوم ولكن كل الفنادق دى مافيش لها بلاج ولا بسين زى ما الناس متعودة على شرم الشيخ والغردقة.. وفى هناك فنادق فخمة جدا جدا زى فندق كارلوس مثلا ودا بقى فندق 5 نجوم ليه حمامات سباحة وليه شاطئ خاص وخدمات راقية ولكن سعر بيكون اكتر من 7000 جنيه فى الليلة الواحدة ونوعية الفنادق دى فى مطروح قليلة جدا جدا وبتكون طبعا غالية وفى فندق النسور للقوات الجوية ودا الليلة فيه للغرفة ب ٤٠٠٠ ج تقريبا.
اقامتك يا هتكون داخل حدود البلد زى مناطق وسط البلد وشارع العوام وشارع اسكندرية والكونيش والليدو وعلم الروم ... وافضل وأرقى مناطق مطروح السكنية هى منطقة البوسيت .. او هتكون خارج حدود البلد زى مناطق الابيض وعجيبة والغرام وكليو باترا وزى مثلا بورتو مطروح. وطبعا ال جوا البلد أفضل فى الاقامة من حيث الخدمات والخروجات ولكن ال برا البلد افضل من حيث الهدوء والاسترخاء.
خد بالك من نقطة مهمة جدا وانت بتحجز السكن بتاعك .. مطروح فيها مشكلة فى خط المياه مستمرة فاتاكد ان العمارة ال هتنزل فيها فيها خزان مياه وان المياه مش بتنقطع فيها باستمرار لان دى هتبقى مشكلة كبيرة بالنسبة لك واتاكد لو الشقة مش مكيفة انها تكون بحرى .
الاكل والوجبات
مطروح فى كل مكان وكل شارع فى مطاعم وكافيهات وخصوصا شارع الكورنيش عندك هناك كنتاكى وماكدونالز ومطاعم كتير مشويات واسماك ومطاعم بدوية وغيرها وهتلاقى المطاعم منتشرة فى كل مكان حواليك .. بس انصحكم نصيحة تصحو فى يوم بدرى قبل ما تنزلو البلاج تنزلو الساعة 7 ص او قبل كدا وتروحو حلقة السمك تظبطو طلبية سمك من الحلقة هناك طازة وتودوه لحد ينضفو ويشويه وتبقى غدوة سمك جميلة واسعار السمك فى الحلقة ممتازة . وغير كدا عندك سوق الخضار فى شارع اسككندرية هتلاقى الجزارين وبتاع الفراخ والمخابز ومحلات الخضار والماركت وهناك اسعار الماركت عادية مش سياحية خالص بس ممكن الخضار والفاكهة واللحوم هناك اغلى من اسواق القاهرة شوية بس مش بالسعر المبالغ فيه يعنى .
طبعا انت فى اى مكان فى مطروح بلاش تشرب من الحنفية ولا حتى في السكن اشرب من مياه معدنية تشتريها أفضل واضمن.
الحاجات ال ممكن تجيبها مميزة فى مطروح او الهدايا ال تخدها معاك وانت مروح اللب الابيض طبعا مشهور فى مطروح / الزيتون ومنتجات واحة سيوة مثل زيت الزيتون والبلح / التين البرشومى ممتاز هناك / وفى ناس بتخد هريسة ومشبك)
نتمنى لكم مصيف سعيد