لو مش عارف يفتح حساب بنكي بسبب الوظيفة
إزاى اضيف وظيفة #مصمم_جرافيك في البطاقة
الطريقة بالتفصيل:
حضرتك سواء فرى لانس او شغال في شركة ، اكيد مش متأمن عليك ، وبالتالي لما تروح تجدد بطاقتك وعايز تعمل وظيفة مصمم جرافيك هيكون الرد خد الاستمارة امضيها في التأمينات، وانت مش متأمن عليك وبالتالي الموضوع يتوقف ومفيش إضافة الوظيفة،
لو متأمن عليك ؟ التأمينات تختم لك انك مصمم جرافيك لأنك تابع لهيئة او شركة ومتأمن عليك باسم وظيفتك
او انت مش موظف أو شغال اون لاين
في الحالة دي الدولة وفرت لك خاصية اسمها (مزاولة مهنة) وهنا تبدأ الخطوات (انا من اسكندرية هشرحلك اللى حصل معايا)
1- تروح مديرية القوة العاملة (مش مكتب عمل صغير) دى الإدارة العامة
2- تقول لهم عايز اعمل (ترخيص مزاولة مهنة)
3- تحدد لهم الوظيفة مصمم جرافيك
4- هيتحدد لك مكان يختبروك فيه (مش ساعتها) لا في ميعاد اخر
5- يومين وهتروح تستلم النتيجة عبارة عن (كارنيه ورق مكتوب فيه انك مصمم جرافيك + شهادة كرتونية باسمك وتقديرك سواء محدود او ماهر
6- تمضى استمارة السجل المدني من القوى العاملة ان انت اصبحت مصمم جرافيك
7- تسلم الاستمارة في السجل المدني وتتصور
الامتحان عبارة عن ايه؟
هتدخل مكان عامل شبه (نت كافيه) أجهزة كتير
وواحد بيسألك شغال ع برنامج ايه هتقولو البرنامج اللى انت شغال عليه
هتقعد ع جهاز هيطلب منك تعمله تصميم خفيف خالص
هيسيبك 10 دقايق ويرجعلك يقولك تمام شكرا حتى لو مخلصتش هو ليه نظرة انت فاهم ولا بتكدب عليه
ملحوظة الأجهزة مفيش عليها نت يعنى مش هتعرف تنزل template وتعدل عليه انت هتشتغل ع الموجود في البرنامج نفسه
المصاريف كام والورق المطلوب؟
تقريبًا 200 جنيه لزوم استمارة وتقديم
مطلوب من حضرتك صورة بطاقتك + 2 صورة شخصية (4×6)
هل التقدير يفرق؟
لو انت مسافر برة مصر هيفرق معاك وبتحاول تفهمه انك مسافر برة مصر عشان يراعيك لان الأفضل مسافر برة تشتغل مصمم جرافيك ومكتوب في شهادة الخبرة انك (خبرة محدودة)
طيب لو مش مسافر؟ لا يفرق معاك التقدير لان سواء محدودة او ماهر هيتكتب في البطاقة مصمم جرافيك
ملاحظات:
انت بالشكل ده متسجل فى أكثر من وزراه انك مصمم جرافيك، وزارة العمل، والسجل المدني، والمديرية،
الكارنيه اللى بتسلمه من القوى العاملة انك مصمم جرافيك بيتجدد كل 5 سنين